சென்னையில் மல்லிகைப்பூ விலை ‘கிடுகிடு’ உயர்வு Chennai jasmine flower price increases

Img சென்னையில் மல்லிகைப்பூ விலை 'கிடுகிடு' உயர்வு Chennai jasmine flower price increases

சென்னை, டிச. 12-

திருமணம், நிச்சயதார்த்தம் உள்பட எல்லா சுபகாரிய நிகழ்ச்சிகளிலும் மல்லிகைப்பூ முக்கிய பங்கு வகிக்கிறது. சமீப காலமாக மல்லிகை பூ விலை, தங்கம் விலையைப்போன்று அதிகரித்து வருகிறது.

இதனால் தலை நிறைய பூக்கள் வைத்து வந்த பெண்கள், தற்போது பெயரளவில் மட்டும் தலையில் பூவை வைத்துச்செல்லும் சூழ்நிலை ஏற்பட்டுள்ளது.

பூக்களின் விலை உயர்வுக்கான காரணம் குறித்து, சென்னை கோயம்பேடு மலர் மொத்த வியாபாரிகள் சங்க தலைவர் அருள் விசுவாசம் கூறியதாவது:–

சென்னை கோயம்பேடு மலர் அங்காடிக்கு திருவள்ளூர், காஞ்சீபுரம், திருத்தணி உள்பட இடங்களில் இருந்து அன்றாடம் 10 முதல் 12 மினிவேன்கள், ஆட்டோக்கள் மூலம் 10 ஆயிரம் முதல் 12 ஆயிரம் கிலோ வரை மல்லிகைப்பூக்கள் வரத்து இருந்து வந்தது.

தற்போது பனிபொழிவின் தாக்கம் அதிகமாக இருப்பதால் மல்லிகைப்பூவின் உற்பத்தி கடுமையாக பாதிக்கப்பட்டுள்ளது. இதனால் தற்போது மலர் அங்காடிக்கு வெறும் 3 முதல் 5 ஆட்டோக்கள் மூலம் 2 ஆயிரம் முதல் 3 ஆயிரம் கிலோ வரை மட்டுமே மல்லிகைப்பூ வருகிறது.

இதன் காரணமாக மல்லிகைப்பூவுக்கு கடும் கிராக்கி ஏற்பட்டுள்ளது. கடந்த மாதம் ரூ.300 முதல் ரூ400 வரை விற்பனையான மல்லிகைப்பூ, தற்போது ஒரே மாதத்தில் கிலோவுக்கு ரூ.800 வரை விலை உயர்ந்து, கடந்த 2 நாட்களாக மல்லிகைப்பூ கிலோ ரூ.1,000 லிருந்து ரூ.1,200 வரை விற்பனை செய்யப்பட்டு வருகிறது.

தொடர்ந்து முகூர்த்த நாட்கள் வருவதால் இன்று மல்லிகைப்பூவின் விலை மேலும் அதிகரிக்கும். பிப்ரவரி மாதத்திற்கு பிறகே பூக்கள் விலை குறையும் என்று எதிர்பார்க்கப்படுகிறது.

மல்லிகைப்பூ மட்டுமின்றி முல்லை, ஜாதி, கனகாம்பரம், ரோஜா, செண்டுமல்லி உள்பட பூக்களின் விலையும் கிலோவுக்கு சராசரியாக 5 சதவீதம் வரை விலை அதிகரித்துள்ளது.

இவ்வாறு அவர் கூறினார்.

சென்னை கோயம்பேடு மார்க்கெட்டில் நேற்றைய பூக்கள் விற்பனை நிலவரம்:–

(கிலோவில்) முல்லை– ரூ.800, ஜாதி– ரூ.500, கனகாம்பரம்– ரூ.600, சாமந்தி– ரூ.100, ரோஜா– ரூ.100, செண்டுமல்லி– ரூ. 50.
...